
大寶伏藏TD1625ན་རག་དོང་སྤྲུག་སྐོང་བཤགས་བཞུགས་སོ། །སྤྱིའི་ཡན་ལག །སྐོང་བཤགས།
41-36-1a
༄༅། །ན་རག་དོང་སྤྲུག་སྐོང་བཤགས་བཞུགས་སོ། །སྤྱིའི་ཡན་ལག །སྐོང་བཤགས།
༄༅། །ན་རག་དོང་སྤྲུག་སྐོང་བཤགས་བཞུགས་སོ། །
41-36-1b
༄༅། །ཧཱུྃ། །ཞི་ཁྲོ་རབ་འབྱམས་ལྷ་ཚོགས་རྣམས། །འོག་མིན་དབྱིངས་ནས་སྤྱན་དྲངས་ལ། །དངོས་སུ་གསལ་བར་དམིགས་པ་ཡིས། །ཉམས་ཆགས་བསྐང་ཕྱིར་ཕྱག་འཚལ་ལོ། །ཧཱུྃ། རང་རིག་རང་ཤེས་འཁྲུལ་པ་བྲལ། །མཉམ་ཉིད་ངང་ལས་ཡེ་ཤེས་ཤར། །ཀུན་ཏུ་བཟང་པོ་ཡབ་ཡུམ་ལ། །ཡིད་ཆོས་དག་ཕྱིར་ཕྱག་འཚལ་ལོ། །མི་རྟོག་དབྱེར་མེད་དགོངས་པ་ལ། །ཡེ་ཤེས་ལྔ་ཡི་འོད་མདངས་གསལ། །རིགས་ལྔ་བདེ་བར་གཤེགས་པ་ལ། །ཉོན་མོངས་དག་ཕྱིར་ཕྱག་འཚལ་ལོ། །དབྱིངས་ཀྱི་ངང་ལས་བསྐྱེད་པའི་རྒྱུ། །ཡེ་ཤེས་ལྔ་ཡི་གྲོགས་ཤར་བས། །དབྱིངས་ཀྱི་ཡུམ་ཆེན་ལྔ་རྣམས་ལ། །འབྱུང་བ་དག་ཕྱིར་ཕྱག༴ ཡེ་ཤེས་སྤྲུལ་པ་མང་པོའི་ཚོགས། །འགྲོ་བའི་དོན་དུ་རང་ཤར་བའི། །བྱང་ཆུབ་སེམས་དཔའ་བརྒྱད་རྣམས་ལ། །དབང་ཤེས་དག་ཕྱིར་ཕྱག༴ ཡེ་ཤེས་ངང་ལས་ཡོན་ཏན་རྫོགས། །ཅི་འདོད་དངོས་གྲུབ་ཆར་ལྟར་འབེབ། །མཆོད་པའི་ལྷ་མོ་བརྒྱད་རྣམས་ལ། །ཡུལ་དུས་དག་ཕྱིར་ཕྱག་འཚལ་ལོ། །གདུག་པ་འདུལ་མཛད་དཔའ་བོའི་སྐུ། །བདག་ཏུ་འཛིན་པའི་སྐྱོན་དང་བྲལ། །ཏ་ཀྲྀཏ་སྒོ་བ་བཞི་རྣམས་ལ། །ལོག་ལྟ་དག་ཕྱིར་ཕྱག༴ བྱམས་དང་སྙིང་རྗེ་དགའ་བ་དང་། །བཏང་སྙོམས་བཞི་
41-36-2a
ཡིས་འགྲོ་དོན་མཛད། །སྒོ་སྐྱོང་ཁྲོ་མོ་བཞི་རྣམས་ལ། །རྟག་ཆད་དག་ཕྱིར་ཕྱག་འཚལ་ལོ། །རྟོག་པ་དྲུག་ལས་འཁོར་བ་དྲུག །མ་རིག་དབང་གིས་བྱུང་བ་ན། །ཐུགས་རྗེས་འདུལ་མཛད་ཐུབ་དྲུག་ལ། །འཁྲུལ་པ་དག་ཕྱིར་ཕྱག་འཚལ་ལོ། །ཧཱུྃ། །ཀུན་ཏུ་བཟང་པོ་རིག་པའི་རྩལ། །ཆེ་མཆོག་གཙོ་ལ་ཕྱག་འཚལ་ལོ། །དུག་ལྔ་མ་སྤང་མཐར་ཕྱིན་པའི། །ཧེ་རུ་ཀ་ལ༴ དབྱིངས་ལས་སྐུར་བཞེངས་ཐབས་ཤེས་སྦྱོར། །ཁྲོ་མོ་ཡུམ་ལ་ཕྱག༴ ཐུགས་ལས་སྤྲུལ་པའི་གསང་ཆེན་མོ། །ཁྲོ་མོ་བརྒྱད་ལ་ཕྱག༴ ཟ་བྱེད་མཆེ་གཤོག་ཕོ་ཉ་མོ། །ཕྲ་མེན་བརྒྱད་ལ༴ འགུགས་འདྲེན་འཆིང་སྡོམ་དགྱེས་མཛད་མ། །སྒོ་མ་བཞི་ལ་ཕྱག༴ འཇིག་རྟེན་ཆ་ལུགས་སྤྲུལ་པ་མོ། །དབང་ཕྱུག་མ་ལ་ཕྱག་འཚལ་ལོ། །ཧཱུྃ། །ཡ་མཱནྟ་ཀ་གཤིན་རྗེའི་གཤེད། །རྔམ་བརྗིད་དྲེགས་པའི་འཁོར་གྱིས་བསྐོར། །འཇམ་དཔལ་སྐུ་ལ་ཕྱག༴ ཧཱུྃ། །རྟ་མགྲིན་རྒྱལ་པོ་དབང་གི་ལྷ། །དབང་དྲག་ཐབས་ཀྱི་འཁོར་གྱིས་བསྐོར། །པདྨ་གསུང་ལ༴ ཧཱུྃ། །དཔལ་ཆེན་བཛྲ་ཧེ་རུ་ཀ །རང་སྣང་གསལ་བའི་འཁོར་གྱིས་བསྐོར། །ཡང་དག་ཐུགས་ལ་ཕྱག༴ ཧཱུྃ། །བཅོམ་ལྡན་ཆེ་མཆོག་ཧེ་རུ་ཀ །ཞི་ཁྲོ་རབ་འབྱམས་ལྷ་ཡིས་བསྐོར། །
41-36-2b
ཡོན་ཏན་རྒྱས་ལ༴ ཧཱུྃ། །རྡོ་རྗེ་གཞོན་ནུ་ཕྲིན་ལས་སྐུ། །ཁྲོ་བཅུ་འབར་བའི་འཁོར་གྱིས་བསྐོར། །ཕྲིན་ལས་མཛད་ལ་ཕྱག༴ ཧཱུྃ། །མངོན་རྫོགས་རྒྱལ་པོ་ཧེ་རུ་ཀ །འབྱུང་བ་ལྔ་ལས་གྲུབ་པའི་འཁོར། །མ་མོའི་ཚོགས་ལ་ཕྱག༴ ཧཱུྃ། །རིག་འཛིན་རྡོ་རྗེ་དྲག་པོ་རྩལ། །ས་དང་ལམ་ལ་གནས་པའི་འཁོར། །རིག་འཛིན་ཚོགས་ལ་ཕྱག༴ ཧཱུྃ། །གསང་བའི་བདག་པོ་གོས་སྔོན་ཅན། །འཇིག་རྟེན་དྲེགས་པ་རྣམས་ཀྱིས་བསྐོར། །བསྟན་པ་སྐྱོང་ལ་ཕྱག༴ ཧཱུྃ། །སྟོབས་ལྡན་ནག་པོ་མཐུ་རྩལ་ཅན། །དྲག་སྔགས་བདག་པོ་མང་པོས་བསྐོར། །དགྲ་བགེགས་འདུལ་ལ་ཕྱག་འཚལ་ལོ། །དེ་ལྟར་རྒྱལ་བ་ཞི་ཁྲོའི་ལྷ། །གང་གིས་མཚན་ཐོས་ཕྱག་འཚལ་ན། །དམ་ཚིག་ཉམས་ཆག་ཀུན་བྱང་ནས། །མཚམས་མེད་ལྔ་ཡི་སྡིག་པ་དག །ན་རག་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །ལས་ཀྱི་རྣམ་པར་སྨིན་པའི་སྐྱོན། །ངག་ཏུ་མཐོལ་ལ་ཡིད་ཀྱིས་བཤགས། །སྨྲེ་སྔགས་བཏོན་ལ་གདུང་བས་སྦྱང་། །མོས་པས་ཐལ་མོ་སྙིང་གར་སྦྱར། །དད་པས་བརྐྱང་ཕྱག་བརྡབས་ཏེ་བཙལ། །ཞི་ཁྲོའི་ལྷ་ཚོགས་མཚན་ནས་བརྗོད། །རྗེས་སུ་ལུས་ལྔ་ཚུགས་བཅས་ཏེ། །རྡོ་རྗེ་སེམས་དཔའ་སྤྱི་བོར་བསྒོམ། །ན་རག་དོང་སྤྲུགས་སྙིང་པོ་བཟླས། །
41-36-3a
དེ་ནས་ཡི་གེ་བརྒྱ་པ་བརྗོད། ཨོཾ་བཛྲ་ས་ཏྭ་ས་མ་ཡ། ། ཞེས་སོགས། ༈ ཧོ། །ཞི་ཁྲོ་རབ་འབྱམས་དགོངས་སུ་གསོལ། །རྒྱལ་བའི་བཀའ་དང་བླ་མའི་ལུང་། །ཇི་བཞིན་མ་སྤྱད་འགལ་ཞིང་འཁྲུལ། །རྡོ་རྗེ་སློབ་དཔོན་དྲིན་ཅན་ལ། །གཤེ་སྐུར་བཏབ་དང་ལྟ་བ་ལོག །གཟུངས་མ་མཆེད་དང་ལྕམ་དྲལ་ལ། །ངན་སེམས་ཚིག་རྩུབ་ཆགས་སྡང་བྱས། །བརྡེག་བཙོག་གནོད་པ་དངོས་སུ་ཤོར། །སྐུ་ཡི་དམ་ཚིག་ཉམས་པ་རྣམས། །ཞི་ཁྲོའི་ལྷ་ཚོགས་སྤྱན་སྔར་བཤགས། །ཡི་དམ་ལྷ་དང་འཁོར་མ་གསལ། །ཛཔ྄་དང་བཟླས་བརྗོད་མ་དག་ཆག །གསུང་གི་དམ་ཚིག་ཉམས་པ་རྣམས། །རིགས་ལྔ་ཞི་ཁྲོའི་སྤྱན་སྔར་བཤགས། །གསང་བཅུའི་གཉེར་གཏད་དམ་བཅས་པ། །ཀུན་ལ་བསྒྲགས་ཤིང་དམ་རྫས་བསྟན། །ཐུགས་ཀྱི་དམ་ཚིག་ཉམས་པ་རྣམས། །རྒྱལ་བ་ཞི་ཁྲོའི་སྤྱན་སྔར་བཤགས། །ཤེས་པར་བྱ་བའི་དམ་ཚིག་ལྔ། །རིགས་ལྔར་མ་ཤེས་ལོག་པར་བལྟས། །མི་སྤང་བ་ཡི་དམ་ཚིག་ལྔ། །མ་རིག་དབང་གིས་དུག་ལྔར་གོལ། །དང་དུ་བླང་བའི་དམ་ཚིག་ལྔ། །གཙང་དམེར་བལྟས་དང་བག་མེད་སྤྱད། །བསྒྲུབ་པར་བྱ་བའི་དམ་ཚིག་ལྔ། །རང་ལ་གནས་
41-36-3b
པར་མ་ཤེས་ལོག །སྤྱད་པར་བྱ་བའི་དམ་ཚིག་ལྔ། །དབྱེ་བསལ་མ་ཤེས་ལོག་པར་སྤྱད། །ཡན་ལག་དམ་ཚིག་ཉམས་པ་རྣམས། །ཡི་དམ་ལྷ་ཡི་སྤྱན་སྔར་བཤགས། །ཧོཿ བསྙེན་ཅིང་སྒྲུབ་པའི་ཏིང་འཛིན་གཡེལ། །ཉ་སྟོང་དུས་དྲུག་མཆོད་པ་ཆག །ལེ་ལོ་གཡེང་བ་གཉིད་ཀྱིས་རྨུགས། །གསོག་འཇོག་སེར་སྣས་རྒྱུ་རྐྱེན་ཚང་། །ཚོགས་ཀྱི་སྤྱང་ཀི་ཁ་ཚར་ཤོར། །ཕུད་ཉམས་ལྷག་མ་ཕྲི་བ་དང་། །བག་མེད་སྤྱོད་པ་རྩིང་བ་ཡིས། །ཚོར་དང་མ་ཚོར་ཉམས་པའི་སྐྱོན། །མཁའ་འགྲོ་དམ་ཅན་སྤྱན་སྔར་བཤགས། །ཧོ །རྒྱལ་བ་ཞི་ཁྲོ་རྡོ་རྗེ་སློབ་དཔོན་དང་། །བདེ་གཤེགས་ཡོངས་རྫོགས་གཟུངས་མ་དམ་ཚིག་ཅན། །སྐུ་གསུམ་གདུང་སོབ་རྡོ་རྗེ་ལྕམ་དྲལ་མཆེད། །དཔང་གྱུར་སྐྱབས་མཆོག་མ་ལུས་དགོངས་སུ་གསོལ། །བདག་ནི་མ་རིག་ལུས་དང་ངག་སེམས་ཀྱིས། །སློབ་དཔོན་མཆེད་སོགས་སྐུ་སྨད་ངན་སྨྲས་ཤིང་། །ཡི་དམ་སྔགས་དང་ཕྱག་རྒྱ་གསང་བ་བསྒྲགས། །རྩ་བའི་དམ་ལས་འགལ་གྱུར་མཐོལ་ཞིང་བཤགས། །ཤེས་བྱ་ལྔ་དང་སྤྱད་པར་བྱ་བ་ལྔ། །མི་སྤང་ལྔ་དང་བསྒྲུབ་པར་བྱ་རྒྱུ་ལྔ། །དང་ལེན་ལྔ་སོགས་ཡན་ལག་དམ་ཚིག་ཀུན། །ཉམས་གྱུར་རང་གནོང་འགྱོད་པས་མཐོལ་ཞིང་བཤགས། །སྔགས་ལ་ཐེ་ཚོམ་བླ་མེད་ཐེག་པ་
41-36-4a
སྨད། །ལྟ་སྤྱོད་ཡ་བྲལ་བསྙེན་སྒྲུབ་གཞུང་མ་བསྲང་། །ལོག་སྤྱོད་ལེ་ལོས་དུས་ཀྱི་མཆོད་པ་ཆག །སྡོམ་གསུམ་ཐུན་མོང་དམ་ཚིག་མཐོལ་ཞིང་བཤགས། །རིག་པའི་རྩལ་ཆུང་སྙིང་པོའི་དོན་མ་རྟོགས། །སྒོམ་པའི་སྲན་ཆུང་གནས་ལུགས་སོ་མ་ཐུབ། །བློ་ཡི་སྟོབས་ཆུང་སྤྱོད་པས་བོགས་མ་ཐོན། །ལེགས་བསམ་སྤྱད་ཀྱང་དོན་ལོག་ཐུགས་འགལ་བསགས། །འབྲས་བུ་ཡིད་སྨོན་གྱུར་པ་མཐོལ་ཞིང་བཤགས། །ཧཱུྃ། །མ་བཅོས་རང་བྱུང་ཆེན་པོའི་རྫས། །གདོད་ནས་དག་པས་གཙང་རྨེ་བྲལ། །རྩ་བ་བརྒྱད་ལ་ཡན་ལག་སྟོང་། །རིགས་ལྔའི་རྒྱལ་བ་སྒྲུབ་པའི་རྫས། །དམ་ཚིག་སྐོང་བའི་སྨན་ཆེན་འདིས། །འོག་མིན་བརྡལ་ཁྱབ་ཆེན་པོ་ན། །རང་བཞིན་བཞུགས་པའི་སངས་རྒྱས་རྣམས། །ཡེ་ཤེས་ལྔ་ཡི་འོད་ཀྱིས་བསྐང་། །ཀུན་བཟང་མཆོད་པའི་སྤྲིན་གྱིས་བསྐང་། །ཐུགས་ཀྱི་དགོངས་པ་རྫོགས་པ་དང་། །ཐུགས་རྗེའི་སྤྲུལ་པས་རིགས་དྲུག་སྒྲོལ། །ཐོག་མའི་སངས་རྒྱས་འོད་མི་འགྱུར། །ཀུན་ཏུ་བཟང་པོའི་ཐུགས་དམ་བསྐང་། །རང་ལ་ཡེ་ཤེས་ཤར་བའི་ལྷ། །ཞི་ཁྲོ་རབ་འབྱམས་ལྷ་ཚོགས་བསྐང་། །ཐུགས་རྗེའི་སྤྲུལ་པས་འགྲོ་དོན་མཛད། །ཐུགས་རྗེས་སྤྲུལ་པས་འགྲོ་དོན་མཛད། །རྡོ་རྗེ་འཆང་ནས་རིམ་པར་བྱོན། །འགྲོ་བ་འདྲེན་པ་ཐམས་ཅད་ཀྱི། །སྐུ་
41-36-4b
དང་ཞིང་ཁམས་མཆོད་པས་བསྐང་། །ཐུགས་ཀྱི་དགོངས་པ་རྫོགས་གྱུར་ཅིག །དམ་ཚིག་ཉམས་ཆག་བཤགས་པར་བགྱི། །ཐུགས་རྗེ་ཆགས་པའི་ཁ་དོག་དམར། །སྲིད་པ་སྐྱེད་པའི་རྒྱུ་ཡི་ཁྲག །པདྨ་རཀྟ་རང་བྱུང་ཁྲག །ཞིང་བཅུ་བསྒྲལ་པ་སྲོག་གི་ཁྲག །རྩི་བཅུད་དམར་པོ་འབྱུང་བའི་ཁྲག །ཐམས་ཅད་དག་པ་དབང་གི་རྫས། །མ་དག་ཁམས་གསུམ་འཁོར་བའི་རྒྱུ། །ཧེ་རུ་ཀ་ཡི་དགོངས་པ་ཡིས། །སྲིད་གསུམ་འཁོར་བའི་བག་ཆགས་བསྒྲལ། །མཆོད་པའི་རྫས་སུ་བྱིན་བརླབས་ཏེ། །ཡུམ་ཆེན་ཀུན་ཏུ་བཟང་མོ་ལ། །ཡེ་ཤེས་འཆར་བའི་དོན་ཕྱིར་འབུལ། །ཁྲག་འཐུང་ཁྲོ་བོའི་ཚོགས་རྣམས་ལ། །ཐུགས་རྗེ་བསྐུལ་བའི་མཆོད་པར་འབུལ། །མ་མོ་མཁའ་འགྲོ་ཐམས་ཅད་ལ། །དམ་ཚིག་གསོ་བའི་རྫས་སུ་འབུལ། །ཆོས་སྐྱོང་བཀའ་སྲུང་ཐམས་ཅད་ལ། །ཕྲིན་ལས་མཛད་པའི་དོན་ཕྱིར་འབུལ། །དམ་ཅན་རྒྱ་མཚོ་ཐམས་ཅད་ལ། །དགྲ་བགེགས་བསྒྲལ་བའི་དོན་ཕྱིར་འབུལ། །དམ་ཚིག་སྐོངས་ལ་དངོས་གྲུབ་སྩོལ། །ཧཱུྃ། །ཁམས་གསུམགསོ་བ་ཟས་ཀྱི་བཅུད། །འབྲུ་དང་ཤིང་ཐོག་རོ་དྲུག་ཟས། །ཞིང་བཅུ་བསྐལ་བ་ཕུང་པོའི་ཤ །ཛ་གད་དཔའ་བོ་འབྲུཡི་བཅུད། །ཞལ་ཟས་འདོད་ཡོན་སྣ་ཚོགས་འབུལ། །མོས་
41-36-5a
པས་བསམས་ཏེ་མཆོད་པར་འབུལ། །ཆོས་ཀྱི་དབྱིངས་སུ་མོས་པས་འབུལ། །ཞི་བའི་ལྷ་ལ་མཛེས་པར་འབུལ། །ཁྲོ་བོའི་ལྷ་ལ་བརྗིད་པར་འབུལ། །བླ་མ་རྣམས་ལ་མཉེས་པར་འབུལ། །མཁའ་འགྲོ་རྣམས་ལ་དགྱེས་པར་འབུལ། །བཀའ་སྲུང་རྣམས་ལ་ཚིམས་པར་འབུལ། །དམ་ཚིག་སྐོང་བའི་རྟེན་དུ་འབུལ། །དེ་ནས་མར་མེའི་ཀོང་བུ་ཐོགས་ལ། །ཧཱུྃ། །རྫས་ཀྱི་ཀོང་བུ་བརྒྱ་རྩ་རུ། །གཙང་མའི་སྡོང་བུ་བརྒྱ་རྩ་བཙུགས། །འབྱུང་བའི་བཅུད་མར་ཞུན་གྱིས་བསྐང་། །གསལ་བའི་མར་མེ་བརྒྱ་སྦར་ནས། །དམ་ཚིག་ཉམས་ཆག་བསྐང་བའི་ཕྱིར། །མོས་པས་རྒྱལ་བ་རྣམས་ལ་འབུལ། །འོག་མིན་ཆོས་དབྱིངས་ཕོ་བྲང་ན། །ཡེ་ཤེས་འོད་ལྔ་བཀྲག་དང་ལྡན། །ཞི་ཁྲོ་རབ་འབྱམས་ཐུགས་དམ་བསྐང་། །སྙིང་ག་ཆོས་ཀྱི་ཕོ་བྲང་ན། །ཡེ་ཤེས་ས་བོན་ཐིག་ལེ་གསལ། །རང་བྱུང་ཞི་བའི་ཐུགས་དམ་བསྐང་། །ཀླད་པ་དུང་ཁང་ཕོ་བྲང་ན། །རང་རྩལ་དྲོད་ཀྱི་འོད་ཟེར་འབར། །རང་བྱུང་ཁྲོ་བོའི་ཐུགས་དམ་བསྐང་། །མོས་གུས་དད་པའི་སྣང་བ་ལ། །རིག་པ་རང་བྱུང་འགག་མེད་གསལ། །རྡོ་རྗེ་སློབ་དཔོན་ཐུགས་དམ་བསྐང་། །རྩ་རླུང་ཐིག་ལེ་དྭངས་པ་ལ། །ཤེས་པ་རང་བྱུང་ས་ལེར་གནས། །མ་མོ་མཁའ་འགྲོའི་
41-36-5b
ཐུགས་དམ་བསྐང་། །འཇིག་རྟེན་སྲིད་པ་ཡངས་པ་ལ། །གཟའ་སྐར་འོད་ཀྱི་ཐིག་ལེ་གསལ། །ཕྱི་ཡི་དམ་ཅན་ཐུགས་དམ་བསྐང་། །དམ་ཚིག་ཉམས་ཆག་ཐམས་ཅད་ཀུན། །ཐུགས་དམ་དབང་གིས་དག་པར་མཛོད། །ཧཱུྃ། །བཀའ་གསང་རྨད་དུ་བྱུང་བའི་དཀྱིལ་འཁོར་དུ། །བླ་མ་ཡི་དམ་ལྷ་ཚོགས་ཡོངས་རྫོགས་ལ། །རང་བྱུང་ཆོས་ཀྱི་དབྱིངས་ཀྱི་ཀོང་བུ་རུ། །རིག་པ་ཡེ་ཤེས་མར་མེ་བལྟམས་ཏེ་འབུལ། །རྩ་བརྒྱད་ཡན་ལག་སྟོང་སྦྱར་ཨ་མྲྀ་ཏ། །སྐུ་ལྔ་ཡེ་ཤེས་ཡོངས་རྫོགས་མཆོད་པར་འབུལ། །གཏོར་གཞོང་རྣམ་དག་དཔལ་གྱི་གཏོར་མས་གཏམས། །འདོད་ཡོན་ཡོངས་སུ་རྫོགས་པའི་མཆོད་པར་འབུལ། །ཁམས་གསུམ་འཁོར་བ་ཡོངས་སྒྲོལ་མཁའ་དབྱིངས་སུ། །ཆགས་མེད་རཀྟ་དམར་གྱི་མཉེས་མཆོད་འབུལ། །ཨ་ལ་ལ་ཏེ་དགྱེས་པར་བཞེས་སུ་གསོལ། །ཉམས་ཆགས་བསྐང་ཞིང་རྟོག་སྒྲིབ་བྱང་གྱུར་ཅིག །སརྦདཱམངྒ་ལཾ།།


